“ De votte succede che tra onda e onda
se stende comme un'improvvisa calma;
e in te l'aia impregnà de bon arsilio
no resta che un silensio un po stupio.
A poco a poco sento nasce in gìo
voxi velae, poi sbraggi de figgèu,
chi scava in te l'aenin, chi zèuga allèa,
chi travaggia a 'na barca, chi a 'na rae;
unna galinn-a a crocca in sce 'na proa,
un'atra a pitta l'aiga da-a scuggèa.
Dormiggia un gatto in meso a due bibbinn-e,
pisaggia unna veggetta sorva a un scain;
chi èuggezza da un barcon, chi sta in sce-a porta
a gòdise l'odò do vento maen;
chi tegne o chèu in te rèuze, chi in te spinn-e,
chi in mille moddi a vitta se conforta.
O Boccadaze, quando a ti se chinn-a
sciortindo da-o borboggio da çittae,
s'à l'imprescion de ritorna in ta chinn-a
o de cazze in te brasse d'unna moae.
Pa che deslengue un po' l'anscia da vitta
sentindo come lì s'eggian fermae
ne-a bella intimitae da to marinn-a
a paxe antiga e a to tranquillitae. „

“ Edoardo Firpo „